Sufi Ghulam Mustafa Tabassum: The Urdu Poet (in Urdu)

۔

                                صوفی تبسؔم

الٰہی کیوں تن  مردہ  میں جاں نہیں  آتی
وہ بے نقاب ہیں تربت کے پاس بیٹھے ہیں

 زندگی:
          صوفی غلام مصطفی تبسؔم اردو، فارسی اور پنجابی زبان کے نامور شاعر، ادیب، نقاد اور عالم تھے۔ نصف صدی تک تعلیم و تدریس اور ادب و فن کے لیے کارہائے نمایاں انجام دینے والے صوفی تبسؔم کی پیدائش 4 اگست 1899ء کو امرتسر میں ہوئی تھی۔ جہاں ان کے بزرگ کشمیر سے آکر آباد ہوئے تھے۔ پہلے آپ کا تخلص اصغر تھا جسے بعد میں بدلکر آپ نے تبسؔم کر لیا تھا۔  صوفی تبسم کے والد کا نام صوفی غلام رسول اور والدہ کا نام فاطمہ تھا۔ آپ بچوں کے مقبول ترین شاعر تھے۔ آپ نے ایف سی کالج لاہور سے بی اے کی ڈگری حاصل کی جب کہ اسلامیہ کالج لاہور سے ایم اے فارسی کی ڈگری حاصل کی۔ ماہانہ لیل و نہار کے مدیر رہے اور براڈ کاسٹر بھی رہے۔ ٹی وی، ریڈیو سے پروگرام "اقبال کا ایک شعر" کرتے تھے۔ اس کے علاوہ کئی دیگر اداروں میں اعلیٰ عہدوں سے منسلک رہے۔ صوفی تبسم پاکستان کرکٹ بورڈ کے پہلے چیئرمین بھی رہے اور انھوں نے شیکسپیئر کے مشہور ڈرامے ’’مڈسمر نائٹ ڈریم‘‘ کا ’’ساون رین کا سپنا‘‘ کے نام سے ترجمہ بھی کیا تھا۔
          فیض احمد فیض، پطرس بخاری، سالک، احسان دانش اور دامن کی صوفی تبسؔم صاحب کے ساتھ بہت دوستی تھی۔ صوفی تبسم اپنی ذات میں ایک انجمن تھے، شاعر، استاد، شارح، مترجم، نقاد اور ادیب ان کی شخصیت کی مختلف جہتیں تھیں۔ ان کی اردو اور فارسی شاعری کے کئی مجموعے شائع ہوئے۔ انہوں نے بچوں کی شاعری کے حوالے سے بے پناہ مقبولیت حاصل کی۔ ان کا تخلیق کردہ کردار ٹوٹ بٹوٹ انہیں بچوں کے ادب میں ہمیشہ زندہ رکھے گا۔
انہیں حکومت ایران نے نشان سپاس اور حکومت پاکستان نے صدارتی تمغہ برائے حسن کارکردگی اور ستارہ امتیاز عطا کیا تھا۔ 7 فروری 1978ء کو صوفی غلام مصطفی تبسم لاہور میں وفات پاگئے۔ وہ لاہور میں میانی صاحب کے قبرستان میں آسودۂ خاک ہیں۔

کام :
          صوفی تبسم نے ادب کے ہر میدان میں اپنے جلوے دکھائے۔ نظم ہو یا نثر، غزل ہو یا گیت، ملی نغمے  ہوں یا بچوں کی نظمیں۔ اُن کی قلم ہر سمت چلی ہے۔ فیروز اینڈ سنز پبلیکیشنز سے انکی بہت سی کتابیں شائع ہوئیں ہیں۔ آپ نے بچوں کے لیے بے شمار کتابیں لکھیں ہیں۔ جن میں جھولنے، ٹوٹ بٹوٹ، کہاوتیں اور پہلیاں، سنو گپ شب وغیرہ شامل ہیں۔ جھولنے تو ننھے منے بچوں کے لیے ایسی کتاب ہے جو ہر بچہ اپنے بچپن میں پڑھتا رہا ہے۔‌ صوفی غلام مصطفی تبسم نے‍ غالب کے فارسی کلام کا ترجمہ بھی کیا ہے جوکہ ان کا بڑا کارنامہ ہے۔ غالب کے فارسی کلام کی شرح تحریر کی جو دو جلدوں میں چھپ چکی ہے۔ اس کے علاوہ صوفی تبسم نے امیر خسرو کے فارسی کلام کا بھی ترجمہ کیا ہے۔ یہ امیر خسرو کی 100 غزلوں کا ترجمہ تھا جو ’’دو گونہ‘‘ کے نام سے شائع ہوچکی ہے۔ اس کی ایک غزل ’’یہ رنگینی نوبہار اللہ اللہ‘‘ گلوکارہ ناہید اختر کی آواز میں ریکارڈ کیا گیا جس نے مقبولیت کے ریکارڈ قائم کردیٔے۔ اس کلام کی تاثیر پاکستان سے ہندوستان  تک بھی پہنچی اور بھارتی موسیقاروں نے فلم ’’جینا صرف میرے لیے‘‘ میں اسی کلام کو ’’مجھے مل گیا میرا پیار اللہ اللہ‘‘ کے الفاظ میں ریکارڈ کیا ہے۔ حسن، جوانی، رعنائی اور دلکشی کے گرویدہ صوفی تبسم کی غزلوں کو فریدہ خانم ،نسیم بیگم اور ناہید اختر نے اپنی آواز دی ہے۔
         صوفی تبسم کی لکھی ہوئی 31 کتابیں مارکیٹ میں موجود ہیں۔ صوفی تبسم نے غالب کی اردو غزلوں کا پنجابی میں ترجمہ کیا جن میں سے ایک غزل گائیک غلام علی نے ’’میرے شوق دا نئیں اعتبار تینوں‘‘ گاکر خوب شہرت حاصل کی۔
صوفی غلام مصطفیٰ تبسم نے بچوں کے لیے بھی بہت لکھا، بچوں سے بے حد محبت کرتے تھے، انھوں نے ایک بار یہ واقعہ سناتے ہوئے بتایا کہ ’’میرے بچے اپنی ماں اور دادی جان سے کہانیاں سنتے تھے، مگر آخر ایک دن ان کی والدہ نے انھیں میری طرف بھیجا کہ جاؤ آج والد صاحب سے کہانی سنو۔ میں نے دو چار دن تو کہانی سنائی مگر پھر میں نے بچوں سے کہا کہ میں آپ کو نظم سناسکتا ہوں اور یوں انھوں نے اپنی بیٹی ثریا کے لیے ایک نظم کہی
          ’’ثریا کی گڑیا نہانے لگی
           نہانے لگی ڈوب جانے لگی
           بڑی مشکلوں سے بچایا اسے
           کنارے پہ میں کھینچ لایا اسے
          پھر ایک بچہ جو صوفی تبسم کے دوست عبدالخالق کا بیٹا تھا اور جو عموماً عجیب و غریب حرکتیں کرتا، اس بچے سے ایک کردار نے جنم لیا اور وہ مشہور و معروف کردار ’’ٹوٹ بٹوٹ‘‘ ہے جو آج بھی بچوں کے پسندیدہ کردار ہے اور گنگنایا جاتا ہے:
          ایک تھا لڑکا ٹوٹ بٹوٹ
          باپ تھا اس کا میر سلوٹ
          پیتا تھا وہ سوڈا واٹر
          کھاتا تھا بادام اخروٹ
          صوفی غلام مصطفیٰ تبسم ایسے شاعر تھے جو اپنے کلام پر قادر تھے، آپ محض اردو کے شاعر ہی نہیں بلکہ پنجابی اور فارسی کے بھی بلند پایہ شاعر تھے۔ صوفی تبسم کی شاعری میں محبت کے جذبات کی سچی اور صحیح ترجمانی ملتی ہے۔ صوفی تبسم کو عشق ومحبت کے جذبات و احساسات کا اتنا واضح شعور تھا کہ وہ اپنے کلام میں جگہ جگہ ان جذبات و احساسات کی صحیح اور سچی تصویر کھینچ کر رکھ دیتے تھے۔ اس کی ایک واضح مثال ان اشعار میں بھی ملتی ہے:
تبسم نے علامہ اقبال کی زندگی میں ان کی شاعری کے لیے بہت کام کیا۔ انھوں نے علامہ اقبال کی شاعری کے عنوان سے ایک طویل مقالہ تحریر کیا، جسے علامہ اقبال نے بہت سراہا تھا۔

اہم کام:

      ☆مجموعہ ٹوٹ بٹوٹ
      ☆اب سب ہیں ٹوٹ بٹوٹ میاں
      ☆جھولنے
      ☆دو گونہ
      ☆ساون رین کا سپنا

اہم غزلیں:
      ☆وہ مجھ سے ہوئے ہم کلام اللہ اللہ
‌‌      ☆وہ حسن کو جلوہ گر کریں گے
      ☆بجھی بجھی سی ستاروں کی روشنی ہے ابھی
      ☆جان دے کر وفا میں نام کیا
      ☆ہر ذرہ ابھر کے کہہ رہا ہے
      ☆جب بھی دو آنسو نکل کر رہ گئے
      ☆کس نے غم کے جال بکھیرے
      ☆جانے کس کی تھی خطا یاد نہیں
      ☆جب اشک تری یاد میں آنکھوں سے ڈھلے ہیں
      ☆غم نصیبوں کو کسی نے تو پکارا ہوگا
      ☆سو بار چمن مہکا سو بار بہار آئی
      ☆خاموشی کلام ہو گئی ہے
      ☆زندگی کیا ہے اک سفر کے سوا
      ☆تو نے کچھ بھی نہ کہا ہو جیسے
      ☆تجھ کو آتے ہی نہیں چھپنے کے انداز ابھی
      ☆ہزار گردش شام و سحر سے گزرے ہیں
      ☆نگاہیں در پہ لگی ہیں اداس بیٹھے ہیں۔
                       ●●●